న్యూఢిల్లీ: ఉక్రెయిన్ సంక్షోభంపై ప్రధాని నరేంద్ర మోదీ శనివారం ఉన్నత స్థాయి సమావేశం నిర్వహించారు. ఈ సమావేశంలో, ఉక్రెయిన్ నుండి భారతీయుల తరలింపు కోసం ఆపరేషన్ గంగాను తీవ్రతరం చేయడంతో పాటు, ప్రస్తుత పరిస్థితిపై చర్చ జరిగింది. విదేశాంగ మంత్రి ఎస్ జైశంకర్, ఎన్ఎస్ఏ అజిత్ దోవల్, విదేశాంగ కార్యదర్శి హర్షవర్ధన్ ష్రింగ్లా, కేంద్ర మంత్రి పీయూష్ గోయల్, ఉన్నతాధికారులు ఈ సమావేశంలో పాల్గొన్నారు. ఉక్రెయిన్ సంక్షోభంపై తరచూ సమావేశాలు నిర్వహిస్తూ భారతీయుల తరలింపు కార్యకలాపాలను ప్రధాని మోదీ సమీక్షిస్తున్నారు. ప్రస్తుతం ఉక్రెయిన్ నుంచి భారతీయులు క్షేమంగా తిరిగి రావడానికి ప్రభుత్వం ప్రాధాన్యత ఇస్తోంది.
విదేశాల్లో చిక్కుకుపోయిన తమ పౌరులను రక్షించేందుకు భారతదేశం ఎల్లప్పుడూ తక్షణ చర్యలు తీసుకుంటుందని ప్రధాని మోదీ అనేక సందర్భాల్లో చెప్పారు. ఉక్రెయిన్‌లో చిక్కుకుపోయిన భారతీయులను సురక్షితంగా తిరిగి తీసుకురావడమే మా ప్రధాన ప్రాధాన్యత అన్నారు. కాగా, ఉక్రెయిన్‌లోని ఖార్కివ్ నగరం నుంచి దాదాపు భారతీయులందరినీ తరలించినట్లు విదేశాంగ శాఖ అధికార ప్రతినిధి అరిందమ్ బాగ్చి తెలిపారు. గత 24 గంటల్లో 15 విమానాలు భారతీయ పౌరులను తీసుకుని భారత్‌కు చేరుకున్నాయి.
విదేశాంగ మంత్రిత్వ శాఖ ఇచ్చిన సమాచారం ప్రకారం, యుద్ధం తర్వాత ఆపరేషన్ గంగా కింద 13,300 మంది భారతీయులను తీసుకుని 63 విమానాలు భారతదేశానికి చేరుకున్నాయి. రాబోయే 24 గంటల్లో మరో 13 షెడ్యూల్ చేసినట్టు తెలిపారు. భారత పౌరుల పునరాగమనం కోసం సమన్వయం చేసేందుకు ప్రభుత్వం నలుగురు మంత్రులను ఉక్రెయిన్ పొరుగు దేశాలక పంపిందన్నా విషయం మీడియా పవర్ పాఠకులకు విదితమే. భారత విదేశాంగ మంత్రి ఎస్ జైశంకర్ కూడా తన సహచరులతో ఈ అంశంపై నిరంతరం చర్చిస్తున్నారు.
ఈ విషయమై ప్రధాని మోదీ స్వయంగా రష్యా అధ్యక్షుడు వ్లాదిమిర్ పుతిన్‌తో రెండు సార్లు ఫోన్లో మాట్లాడారు. బుధవారం, ప్రధాని పుతిన్‌తో టెలిఫోన్‌లో మాట్లాడి ఉక్రెయిన్ నుండి భారతీయ పౌరులను సురక్షితంగా తరలించే అంశంపై చర్చించారు. ఉక్రెయిన్ అధ్యక్షుడితో కూడా ప్రధాని మోదీ మాట్లాడారు. యుద్ధం ప్రారంభమైన తర్వాత పుతిన్‌తో జరిగిన మొదటి సంభాషణలో, హింసను అంతం చేయాలని ప్రధాని మోదీ విజ్ఞప్తి చేశారు. అలాగే భద్రతా మండలిలో కూడా, ప్రతిష్టంభనను చర్చల ద్వారా పరిష్కరించుకోవాలని భారత్ ఇరుపక్షాలకు సూచించినట్టు తెలుస్తోంది.
