మీడియా పవర్, న్యూఢిల్లీ, మార్చ్ 02 2022 : అతి త్వరలోనే ఇంధన ధరలు ఎగిసిపడనున్నాయి. వచ్చే వారం నుంచి పెట్రోల్, డీజిల్‌ ధరలపెంపుప్రారంభం కానుందని స్పష్టమైన సంకేతాలు వస్తున్నాయి. ముఖ్యంగా దేశంలోని పలు రాష్ట్రాల్లో జరుగుతున్న ఎన్నికలు పూర్తి కాగానే కేంద్ర ప్రభుత్వం పెంపుదలను ప్రారంభించనుందని తెలుస్తోంది. మరోవైపు ఉక్రెయిన్‌ సంక్షోభంతో అంతర్జాతీయంగా చమురు ధరలు బ్యారెల్‌కు 100 డాలర్లు దాటిపోయిందన్న సాకుతో ఈ మోత మోగించనుందని తెలుస్తోంది. కాగా.. 2014 మధ్య కాలంలోనూ బ్యారెల్‌ చమురు ధర 110 డాలర్లుగా నమోదయినప్పటికీ ఆ సమయంలో ప్రజలపై పెద్దగా భారం పడలేదు. కానీ బిజెపి ప్రభుత్వం అధిక పన్నులు వేస్తూ ప్రజల నడ్డీ విరుస్తుందనే విమర్శలు వినిపిస్తున్నాయి. చమురు మంత్రిత్వ శాఖలోని పెట్రోలియం ప్లానింగ్‌ అండ్‌ అనాలిసిస్‌ సెల్‌(పిపిఎసి) రిపోర్ట్‌ ప్రకారం మార్చి ఒకటిన భారత్‌ కొనుగోలు చేసే ముడి చమురు బాస్కెట్‌ బ్యారెల్‌కు 102 డాలర్ల కంటే ఎక్కువగానే పెరిగింది. ఆగస్టు 2014 తర్వాత ఇదే అత్యధికం. ఉత్తరప్రదేశ్‌ శాసనసభ చివరి దశ పోలింగ్‌ మార్చి 7తో ముగియనున్నాయి. ఈ ఏడో దశ పోలింగ్‌ తర్వాత మార్చి 10న ఓట్ల లెక్కింపు జరుగనుంది. ఈ పరిణామం అయిపోగానే ఇంధన ధరల వేడి మరింత ఊపందుకోనుందని నిపుణులు అంచనా వేస్తున్నారు. వచ్చే వారంలో రాష్ట్ర ఎన్నికలు ముగియనున్నందున ఎప్పటిలాగే రోజువారీ ఇంధన ధరల పెంపుదల ప్రారంభం కానుందని బ్రోకరేజి సంస్థ జెపి మోర్గాన్‌ విశ్లేషించింది. ప్రస్తుత లీటర్‌ ఇంధన ధరలపై మరో రూ.9 పెరగనుందని అంచనా వేసింది. హైదరాబాద్‌లో ప్రస్తుతం లీటర్‌ పెట్రోల్ ధర రూ.108గా, డీజిల్‌ ధర రూ.95గా ఉంది. ధరల పెరుగుదల ప్రారంభమైతే లీటర్‌ పెట్రోల్ ధర రూ.120 వరకు, డీజిల్‌ ధర వంద దాటి రూ.105కు చేరనుంది. దీంతో దేశంలో ద్రవ్యోల్బణం మరింత ఎగిసిపడనుంది. ప్రజల కొనుగోలు శక్తి హరించుకుపోనుంది. ఆర్థిక వ్యవస్థపై తీవ్ర ప్రతికూల ప్రభావం పడనుందాని ఆర్ధిక విశ్లేషకులు చెబుతున్నారు.
