ఈ సందర్భంగా జిల్లా పోలీసు అధికారి మాట్లాడుతూ అగ్నివీర్ ఎంపికలు ఎంతో ప్రతిష్టాత్మకమైనవని రాష్ట్రంలో తొలిసారిగా జిల్లాలో జరుపుకోవడం చాలా సంతోషంగా ఉందన్నారు. దక్షిణ ఆంధ్రప్రదేశ్ లోని రాయలసీమ జిల్లాలు గుంటూరు జోన్ ప్రాంతంలోని అభ్యర్థులకు ఆర్మీ రిక్రూట్మెంట్ ఎంపికలు జిల్లాలో జరుగుతున్నాయన్నారు. ఆర్మీ ఎంపికల కోసం వచ్చే అభ్యర్థులకు నగరంలోని ప్రభుత్వ సర్వజన వైద్యశాల ఆవరణలో ఎవరు ముందు వస్తే వారికి టోకెన్లు ఇవ్వాలన్నారు. వారికి మంచినీరు అందుబాటులో ఉంచడంతోపాటు పబ్లిక్ అడ్రస్ సిస్టం ద్వారా ఎప్పటికప్పుడు సూచనలు తెలియజేయాల్సి ఉంటుందన్నారు. ఆర్మీ సిబ్బందికి పోలీసులు సంపూర్ణ సహకారం అందించాలన్నారు.
సైనిక సిబ్బంది చెప్పే సూచనలను విధిగా పాటించాలని వారితో సమన్వయం చేసుకొని ఎంపికలు సజావుగా జరిగేలా చూడాలన్నారు. పోలీసులు ఎవరూ కూడా నిర్లక్ష్యంగా వ్యవహరించరాదని విధుల్లో అలసత్వం వహిస్తే క్రమశిక్షణ చర్యలు తప్పవని హెచ్చరించారు.
గుంటూరు ఆర్మీ రిక్రూట్మెంట్ అధికారి కల్నల్ కోహ్లీ మాట్లాడుతూ కుటుంబంలోని అన్నదమ్ముల వలె ఒకరికొకరు సహకరించుకొని ఆర్మీ రిక్రూట్మెంట్ ర్యాలీని విజయవంతం చేయాల్సి ఉంటుందన్నారు. ప్రభుత్వ సర్వజన ఆసుపత్రి ఆవరణతో పాటు స్టేడియంలో రెండు చోట్ల ఎప్పటికప్పుడు పారిశుధ్యం సజావుగా ఉండేలా చూడాలన్నారు. మంచినీటిని అందుబాటులో ఉంచాలన్నారు. సీసీటీవీ కెమెరాలు సజావుగా పనిచేసేలా చూడాలన్నారు. ఎలక్ట్రీషియన్, పబ్లిక్ అడ్రస్ సిస్టం, వైద్య బృందాలు నిరంతరం పనిచేసేలాగా అందుబాటులో ఉండాలన్నారు. ఆర్మీలో ఎంపిక కోసం వచ్చే అభ్యర్థులను తమ సోదరులు, పిల్లలుగా భావించి ఎలాంటి తారతమ్యం లేకుండా గౌరవప్రదంగా విధులు నిర్వహించాలన్నారు. ప్రతిభా ఆధారంగానే నిక్కచ్చిగా ఎంపికలు చేయబడతాయని, ఎవరిని కూడా ఒప్పించే విధంగా ప్రవర్తించరాదని సూచించారు. అభ్యర్థులకు న్యాయం జరిగేలాగా సిబ్బంది అందరూ విధులు నిర్వహించాలన్నారు. ఆర్మీ ఎంపికలకు దరఖాస్తు చేసుకున్న అభ్యర్థులకు వారు హాజరు కావలసిన తేదీ సమయము తెలిపే అడ్మిషన్ కార్డులను ఇప్పటికే జారీ చేయడం జరిగిందని ఆ ప్రకారం వారిని హోల్డింగ్ ఏరియా అయినటువంటి సర్వజన వైద్యశాలలో వారి ప్రవేశపత్రాలను పరిశీలించి అనుమతించాలన్నారు. ఎంపిక కోసం వచ్చే అభ్యర్థులు తమ వెంట సెల్ ఫోన్లు అనుమతించబడవని గడ్డం లేకుండా ఉంటేనే ఎంపిక పరీక్షలకు అనుమతించడం జరుగుతుందని స్పష్టం చేశారు. వర్షం వస్తే స్టేడియం మైదానంలో కాకుండా బయట రోడ్డుపై పరుగు పరీక్ష నిర్వహించేందుకు వీలుగా ట్రాఫిక్ పోలీసులు ప్రజలకు ఎలాంటి సమస్య లేకుండా ఏర్పాటు చేయాలన్నారు. సర్వజన ఆసుపత్రి ప్రాంగణంలో హాజరు వేసుకుని డాక్యుమెంట్లు పరిశీలించాక వారు ఎత్తు పరీక్షించి స్టేడియంలోకి అనుమతించడం జరుగుతుందన్నారు.
ఆర్ముడ్‌ రిజర్వ్ అదనపు ఎస్పీ శ్రీనివాసరావు మాట్లాడుతూ ఆర్మీ ఎంపికల సందర్భంగా ఎలాంటి అవాంఛనీయ సంఘటనలు జరగకుండా జన సమూహాన్ని నియంత్రించేందుకు గట్టి పోలీస్ బందోబస్తుతో సిద్ధంగా ఉన్నామన్నారు. సర్వజన ఆసుపత్రి ఆవరణలో పది కంపార్ట్మెంట్లు ఏర్పాటు చేయడం జరిగిందని, ఒక్కో కంపార్ట్మెంట్లో 300 మంది అభ్యర్థుల చొప్పున 3000 మందిని అనుమతించే ఏర్పాట్లు చేశామన్నారు. అభ్యర్థులు ఎవరు ముందు వస్తే వారికి మొదటగా టోకెన్లు పంపిణీ చేయడం జరుగుతుందన్నారు.ఈ నెల 14వ తేదీ బుధవారం అర్ధరాత్రి 12 గంటల తర్వాత అభ్యర్థులను స్టేడియం లోకి అనుమతించడం జరుగుతుందన్నారు. ఆర్మీ ఎంపికల ప్రతి ప్రక్రియలోను పోలీసు సిబ్బంది ఆర్మీకి సహకారం అందిస్తారన్నారు.
ఈ సమావేశంలో ఆర్మీ రిక్రూట్మెంట్ డైరెక్టర్లు కల్నల్ దీపక్ కుమార్, కల్నల్ వినయ్ కుమార్, కల్నల్ సుమయ,సెట్నెల్ సీఈవో శ్రీ పుల్లయ్య, మునిసిపల్ ఈ.ఈ. శ్రీ, శేషగిరిరావు, ఆర్ అండ్ బి ఎస్ ఈ శ్రీ మురళీకృష్ణ, డిఎస్పీలు శ్రీ గాంధీ, శ్రీ సుబహాన్ మునిసిపల్,రెవెన్యూ, విద్య, వైద్య శాఖల సిబ్బంది పాల్గొన్నారు.
మూలం: జిల్లా సమాచార పౌర సంబంధాల అధికారి, నెల్లూరు
